almasalsharq
مقالات مشابهة
اكتر سؤال موجود كل ساعة ع جروب الأمهات و جروبس التخاطب
ابني مش بيتكلم اعمل أيه
الجواب المعروف : نزليه حضانة و هيتكلم علي طول
طيب هل ده صح و لا ده غلط
الاجابة : غلط
مش كل الاطفال اللي نزلت حضانة تماما اتكلموا كان أولي يقلد بابا و ماما او ولاد الجيران او اللي بيسمعه في التليفزيون
الحضانة مش هتهتم أوي فيه انه يطلب و يقول جمل و لا هتركز
الميس في الفصل مش هتهتم بانها تحفزه هو مخصوص لغويا لان الميس عندها اطفال كتير أوي من الصعب تركز مع ابنك بس كمان الميس مش هتكرر لابنك المتأخر في الكلام الكلمة الغلط بشكل صحيح مرات كتير عشان يصححها لان وراها حاجات كتير و اهمهم الامان لباقي الاطفال
الميس مش هتهتم تماما بتصليح الاصوات اللي الطفل بيغلط فيها و تسيب باقي الفصل يتخانق مع بعضه
فبالتالي بنلجأ الجلسات الفردية و الخطة العلاجية المناسبة لحالة ابنك فقط و اللي جووة الجلسة بنعيد و تزيد
و نغير اهداف و ننوع و نغير من الادوات و الالعاب و نقول اصوات و مقاطع مناسبة لكلام ابنك فقط
في الجماعي مستحيل يحصل ده
طيب بلاش اوديه حضانة ؟!!!!!!
لا نزليه الحضانة و لازم تنزليه حضانة و ضروري جدا ينزل حضانة و لكن مع جلسات فردية لحالة ابنك يشرف عليها أخصائي التخاطب بعد تقييمه و بيان نقاط القوة و الضعف عند الطفل
الحضانة للطفل زي الشغل للاب يعني الحضانة بتعوده علي نظام و التزام وروتين يلتزم بيه و من غير نظام للطفل هيكون فوضوي و كسلان و طبعا ليل مع نهار أمام الاجهزة الالكترونية اللي بتأثر علي الانتباه و التركيز و الذاكرة و السلوك بشكل سيء جدا
الحضانة دورها سلوكي و اجتماعي مهم جدا
تزداد ثقته بنفسه عند اتمامه أنشطة وسط زملاؤه
تنمي مهارة التعاون عند الطفل و معني المشاركة مع الاخرين و كمان بتتعرفي علي ابنك هل هو سيصبح قائد أم تابع من خلال اللعب مع زملاؤه و هتعرفي هل هو شجاع و لا بيخاف و ده من خلال ردود أفعاله علي المواقف اللي بيتعرضلها مع زملاؤه
مهم جدا يعرف يتفاعل اجتماعيا مع بيئة تانية مختلفة تدعوه للاستقلالية بشخصيته و الاعتماد علي نفسه
و عشان ابنك يتكلم هناك مهارات ما قبل الكلام لو مش عند ابنك بننزله الحضانة عشان ينمي المهارات دي فبالتالي يساعد الاخصائي الطفل انه يتكلم
أيضا الحضانة تساعد علي تنمية المهارات المعرفية و الادراكية
عشان كدة الحضانة مع الجلسات الفردية هما اللي بيطوروا الطفل مش حاجة لوحدها هي اللي بتخلي الطفل يتكلم
دمتم موفقين مع اطفالكم
