almasalsharq
Related Articles
ما تتصدمش من العنوان … وركز في كلامي جدااا …اتصور ان معظمنا يعلم ان اخطر واهم مرحله بيمر بيها اي شخص … هي مرحله المراهقة … لانها مرحلة تشكيل الشخصية… وعادة بتبدأ من سن 12 سنه وتستمر لحد سن 18 سنة بداية المرحلة ونهايتها نسبية من فرد لآخر
وبعيدا عن كلام كتب التربية الكلاسيكية … والقواعد المحفوظة في فن التعامل مع الابناء … انا هاقولك على اسلوب ثوري مبتكر …قريتة في مقال من حوالي 3 سنين و طبقتة علي أرض الواقع … وفعلا جاب نتايج مذهله مع أسر كتير
كان عنوان المقال … خليك صديق السوء لابنك !!!
الباحث اللي كتب المقال … بدا بقاعده شهيره في علم النفس بتقول …” ان كل ما هو ممنوع … مرغوب ” … وان النفس البشريه مياله بطبيعتها للتمرد وكسر القيود
وحكى في مقاله ان المراهق بيحتاج لعنصرين مهمين لاكتمال تكوين شخصيتة … صديق يثق فيه … ومثل اعلى يتبعه
وانه في المرحلة دي … بيحاول يلغي تاثير وسيطرة الاب والام عليه و يهمش دورهم في حياته بكل السبل
ذكاء الاب والام … انهم يتحولوا من دورهم التقليدي ويلعبوا دور هذا الصديق وتلك القدوه
وعشان تنجح في الدور الجديد … ارجوك ما تلبعش دور الصديق المفكر المثالي … وغير الاستراتيجيه دي والعب دور صديق السوء … لانه هو فعلا الشخص اللي سهل يخترق عقل وقلب ابنك … وينال اعجابة وثقتة
مش بقولك خليه ينحرف … لكن خليك زي التطعيم كده … والتطعيم للي مش عارف … هو جرعه صغيره جدا من الفيروس … بحيث انها بتكسب الجسم مناعه من الفيروس الاصلي
بشكل ابسط … اعمل مع ابنك الحاجات اللي انت عارف انها غلط … لكن اعملها بعقل وبالمقدار اللي ما يسببش ضرر … وهاديك بعض الامثله
- خليه يزوغ يوم من المدرسه واستناه واخرج معاه روحو سنيما وقضوا اليوم بدون ما اي حد يعرف
- اقعد معاه على القهوه هو واصحابه … وسيبه يجرب الشيشه ويكرهها … وخلي اصحابه يعرفوا انه الوحيد اللي يقدر يشرب … لكن هو اللي مش عاوز … عشان محدش يدخله من سكة انت مش عاوز تشرب عشان لسه عيل وخايف من ابوك
- لو عمل كارثه وجه حكالك … خليك في ضهره … سانده يعدي الموقف وفهمه بعد كده ايه غلطه
- عرف ابنك انه يقدر يغلط ويعترف لك … وانت هاتبقى متفهم … وانك سنده وصاحبه
الخلاصه … خلي ابنك يحبك اوي … لو حبك اوي هايسمعلك و يقدر كلامك … وهيبقى دايما حريص انك ما تزعلش منه
خلي ابنك يطيعك بجد حبا فيك وخوفا على زعلك … مش يمثل انه بيطيعك حبا في المكاسب اللي بياخدها منك …وخوفا من ضربك وقسوتك ابنك كبر مبقاش طفل وفي نفس الوقت طفل مش كبير وارد جدا يكون جسم كبير وعقل طفل ودا بيسبب صراعات داخلية للمراهق
اتمني اكون قدرت اوصل المعلومة اولادنا أمانة نفهم صح نربي صح ربنا يحفظ اولادنا جميعاً.
