almasalsharq
مقالات مشابهة
الأيام الحلوة
أخي العزيز…………………..جرجس ميشيل مينا
زميلي ودفعتي وجاري…….في الحرب في سينا
فاكر لما قفشنا الشاويش………محمود أبو سريع
قاعدين نألف ونلحن ونغني…………أحلى أغانينا
ساعتها كان الطابور……………والكل كان جامع وصوت الآذان جاى…………….من ناحية الجامع وجرس الكنيسة بيدق…………..ويعلن لكل سامع إن عام إنقضى…………وخلاص ما هوش راجع
قعدت النهــاردة أفتكـر……..حكاياتنا مع بعضينا
من زمان قوي…………لما جيتوا وسكنتوا جنبينا
وخدت منك عدوى………………….اللوز والحمى
وجت مس تريزا البيت…………….عشان تداوينا
ما أنساش يوم ما عم ميشيل…….خبط على بابنا وقال إلحقــوا جـرجس……….ياأهالينا وياإخوانا جري جدي حسين…مذعور على شقتكم طوالي وف لحظة اتملى البيت………بجيرانكم وجيراننا
ولا يوم ما أختك مريم………………..جالها العَدَلْ
حِلْفِتْ ما تتزوق إلا……………على يد أختي أمل
والتانية ما صدقت طلعت السشوار…..والعــــدة
وأوام على إيديها وش مريم………..إِحْلَوْ وإتْعَدلَ
يومها أمي فرقت على الحارة كلها……..شربات ودقت خناقة كبيرة بينها……وبين جارتنا عدلات أصل عدلات وجوزها………من النوع المتعصب وما تشوفش وشهم غير في المصايب والأزمات
النهاردة العيد يا دفعة…….. كل سنة وانت طيب
عيد إيه…وعيد مين……………ما يهمنيش ياطيب
هي يعني ها تفرق…………………….ولا ها تفرق
ما احـنا الاثنين بنعبـد رب واحـد وهو لينا قريب
بقلم / محمد عبد القادر
22/4/2022
