جربت يوم احساس بإنك جوا بير مالوش قرار؟
قاعد بصبر وحيره متجرع مرارة الانكسار.
عمال تروّض في الألم يمكن دواه في الانتظار.
جربت تستنى بأمل كداب وانت متأكد وعارف ان دا آخرُه انهيار.
قاعد بتنده ع اللي كنت فاكر انهم شط الامان… السكينه والسلام..
وانت شايف طيف..
احساس مُخيف..
لما تحِس انك ضعيف..
عمّال بتصرخ… تستجير بيهم.. وهُمّا في المقابل.. لا بيسمعوا ولا عمرهم حسّوا بأنينك والألم اللي اعتصر قلبك سنين..
والحنين اللي انهزم جواك بخوفهم وانهم اتعودوا انك تسامح.
التسامح مش مجرد شعور بسيط. لكنه محتاج اجتهاد.. والجهاد في النفس محتاج البطوله..
نسيوا انك في النهايه انسان بسيط.. نسيوا انك وببساطه جواك بشر..
محتاج امان.. محتاج تحس انك مُصان.. محتاج محبه… محتاج سكينه .. محتاج لخِل يكون وفي.. محتاج سفينه… تعدي بيك بر الأمان..
