almasalsharq
Related Articles
تسحرنى ببرائتها وانوثتها واناقتها فهى كاليمامة الضاحكة وكعروس النيل الاسطورية المتبخترة على بساط ماء النيل اللؤلؤى
جذورها مصر الحضارة، وأغصانها خضراء يافعة تتفرع فى كافة ارجاء الوطن العربى وروحها تحلق فى سماء الجمال وصوتها يرنم فرحا وسعادة بكونها انثى عربية
حصريا ولاول مره وفى حوار وسبق صحفى وبمناسبة عيد الحب تكلمت ملكة الموضة الجميلة الرائعة المتميزة سالى برسوم Sallyk من قلبها عن مظهر المراة ومكانتها وعن الجمال والازياء والجديد فى عالم الموضة
بنرحب بحضرتك وبنشكرك على اتاحتك الفرصة لينا عشان نقرب منك ونعرف عنك وعن الموضة والجمال الكثير وعن العلامة Sallyk
س – فى رأيك أى من الشعوب العربية مغرم بالموضة واكثر انفاقا عليها؟
اكيد الشعب اللبنانى ويليه دول الخليج زى الامارات والسعودية والكويت اصحاب الدخول المرتفعة وانا احب يكون لكل واحد استايله وشكله اللى يتناسب مع جسمه وسنه ومنجريش وراء الموضة وخلاص واهم حاجه يكون الانسان مرتاح نفسيا مع لبسه ومظهره
س- بصراحة تقييمك ايه للست المصرية وهل هى مهووسة بالموضة وبتمشى وراها؟
الست المصرية ذكية وبتختار ما يناسبها من الموضه وبما يتناسب ويتماشى مع نظرة المجتمع اللى بتبقا متواجده فيه
س- هل الست المحجبة ليها نصيب من الموضه السنه دى؟
الست المحجبة بتشترى سواريهات ولا اروع وبدأت تبدع وبتحاول تظهر جمالها عن طريق الحجاب وبشوف منهم الكثير فى الافراح متالقين باناقتهم
س- ايه اهم الاكسسوارات اللى تنصحى كل ست واتمنى ان تكون موجوده عندها ولابد من ارتدائها بشكل دورى ؟
الشنط طبعا ولازم كل ست يكون عندها شنطة سوداء وبيج او هافان وساعه يد ماركه كويسه ومعروفه هتغنيها عن الكثير من الاكسسوارات وكمان نظاره شيك وانا مبفضلش المجوهرات الكثيرة مع اللبس
س- ازاى نستغل صناعة الازياء والموضة فى اقامة المعارض وجذب السياحة العربية والاجنبية وبالتالى المساهمه فى دعم الاقتصاد المصرى؟
حلم عمرى كنت اعمل عرض ازياء تاريخى لمصر لتنشيط ودعم السياحة وكنت هدعى اشهر مصممى الازياء العالميين وعرضت الفكره على قيادات الدولة لعمل اسبوع الموضة بصفتى المالكة للاسم والعلامة مع ساندرا برسوم واخترت رجل الاعمال هشام طلعت ومدينتى لاقامة اسبوع الموضة وكنت محدده تاريخ 24 مارس بعد اسبوع الموضة فى فرنسا وروما ونيويورك وقبل اسبوع الموضه فى دبى وكنت عامله مفاجأه مذهلة
براند متكامل بأسم (تحيا مصر) يحتوى على البرفانات والشنط والاحذية وغيرها ولكن للاسف توقف الحلم والمشروع لعدم وجود التمويل الكافى
س- تقييمك ايه لصناع الموضة المصريين وشايفه ازاى صناعه الملابس الجاهزه المصرية فى المستقبل ؟
الصناعة المصرية فى تقدم مذهل فى صناعه الازياء وتصدير الملابس الجاهزة وكمان الحمدلله عندنا مصممين ازياء عالميين ومبدعين وليهم اسمائهم ومكانتهم
س- مين هم عملائك من المشاهير والفنانيين وايه اغرب حاجه انطلبت منك
اشتغلت لكثير من المشاهير والفنانات والشخصيات العامة والمعروفة واتشرفت بتصميم فستان العيد الوطنى لسمو الشيخة موزة وكمان الاميره صوفيا زوجة ولى العهد فى هولندا
س- تقريبا اسعار الفستان السوارية او فستان الزفاف بيبدأ من كام وهل فى فرصه لمحدودى الدخل بالحصول على فستان من تصميمك بقيمة رمزية؟
اسعار فساتين الزفاف ملهاش حدود وكان فى فستان قريب فى الامارات اتكلف مليون دولار مرصع بالاحجار الكريمة والست الشاطرة اللى تختار التصميم اللى بتحبه وتنفذه على اد امكانياتها وفى دلوقت فساتين حلوة ورخيصة لمحدودى الدخل وكمان متاح ايجار الفساتين واسعارها مناسبة لكافة المستويات وانا بالنسبالى كنت عامله كورنر مجانى خاص للعرائس اللى مش قادره تدفع تمنه وكان على مستوى عالى من التجهيزات
س- تفتكرى أغلى فستان عملتيه أتباع بكام وكان أيه قصته وايه أغرب المواقف اللى قابلتك واتصرفتى معاها ازاى وبتخدى راى مين اول لما بتنتهى من عمل قطعه من الملابس قبل تسليمها ؟
طبعا فستان سموة الشيخة بسمة الصباح وقعدت 8 شهور كاملة اشتغل فيه ومن المواقف الغريبة كنت فى عرض ازياء وتعمد احد مصممى الازياء المنافسين وضع قطعة حديد امام احدى العارضات مما تسبب فى قطع فستانها وكمان موقف طريف كنت فى حفل ملكة جمال العرب للانسات فى شرم الشيخ وفوجئت باحد المتسابقات كانت حاملا فاضطريت لعمل فستان سريع فى زمن قياسى لاخفاء بطنها قبل العرض بمدة قليلة
اخيرا بنشكر حضرتك جدا على اللقاء الرائع ده وباتمنالك الصحه والسعاده ومزيد من النجاح والتالق
