almasalsharq
مقالات مشابهة
من ابشع الصفقات الأسرية هى صفقة الكبران قبل الآوان.
لما بيتخلق رغبة غير واعية عند احد الابوين في الآخذ من الطفل قبل العطاء تبدء الصفقة.
لما تقول لطفل او طفلة انت كبير وعاقل ومينفعش تعمل كذا وكذا.
على اساس انك بتحفزه وتحمسه على سلوك معين.
لكن في الواقع انت بتسجنه جوه زنزانه مكتوب عليها كبير وعاقل.
لمجرد ان تأخذ منه نتيجه معينه دون عطاء منك. سواء النتيجة دى سلوك او مشاعر احتواء منه لك.
وهو لا كبير ولا يعرف يعنى ايه عاقل اصلا.
تحول ابنك او بنتك لابوك او امك.
انا شخصيا باعتبرها الانانية الحقيقية بتظهر في اسوء صورها من ام او اب رغبته في ابتلاع الهويه الحقيقية لاحد ابناءه ونسفه شخصيته تماما بمعلومات مغلوطة عن نفسه والمطلوب منه كطفل وبرمجته على برامج معينه يقدم من خلالها الدعم لهم بشكل مباشر وغير مباشر.
ساعتها الطفل او الطفلة بيعيش سنين كتير بمنظومة قيم مشوهه عن نفسه ويجتهد في اظهار عكس ما يفكر ويشعر به لتحقيق رؤية الاب او الام او حتى كلاهما.
ومع مرور الأيام والسنين الطفل بينسي اصلا انه بيحس او حتى بيفكر ويبدء يتعامل في الحياة بقيم الإنسان الآلى بينفذ كل المطلوب منه بالظبط.
ومهما طولت السنين هيجى عليه وقت ينزع بدله الكبير العاقل وينفجر وساعتها هيتصرف تصرفات الأطفال في وقت لما بقي كبير بجد لكن جسمه بس هو الكبر لكن لا عقله ولا مشاعره حصل فيها كبران ولا نضج.
حجم الخسائر بتكون كبيره جدا في لحظة الانفجار وكل ده بسبب صفقة انانية من اب وام لا يعلم احد منهم شيء عن احتياجات طفلهما.
اهم حاجه تلبيه احتياجتهم في رفع يد العطاء الحقيقي عن طفلهما ومد يد الآخذ.
