almasalsharq
مقالات مشابهة
زمان كان في فيلم للبني عبد العزيز اسمه أنا حرة
قد ايه الفيلم ده ظلم مفهوم الحرية في النص التانى من الفيلم في مشهد للبني عبد العزيز وهى بتواجه نفسها هل فعلا الحرية هى اللبس والخروج والموسيقي وعدم المذاكرة ولا الحرية هى السلوكيات الثورجية والاعتراضات على كل موروث ولا الحرية هى التقلييد لمن نصفهم بأنهم أحرار
قد ايه الفيلم ده دمر جوايا واكيد جوه عدد كبير من جيلي أو ما قبله أو حتى ما بعده بأن الحرية تعنى قلة أدب …
لدرجة أن كلمة أنا حرة كان ليها برمجية مجتمعية علي انها اعلان فجور سلوكى أو أخلاقي ….
وطبعا بعد رحلة بحث طويلة مليانه ألم ومعافرة وصلت لأن الحرية السلوكية وهم كبير ….
الحرية الحقيقية هى جوه الشخص …
في بذرة حقيقة جوة النفس بذرة الحقيقة دى لا يقيدها مكان ولا زمان ولا اشخاص ولا حتى ظروف …
بذرة الحقيقة دى هى من سخر لها الكون بالكامل الظاهر منه والباطن …الصالح منه والطالح…
بذرة الحقيقة دى هى البتعرف تعمل أى وكل شيء في الوجود .
بذرة الحقيقة دى هى العندها إجابة لكل واى سؤال في الكون…
بس بكل اسف برمجة الوعى الجمعى صنعت صندوق من زجاج افخر انواع الزجاج وحبست فيه بذرة الحقيقة دى …
انت او انتى الحقيقي محبوس جوه صندوق زجاج من افخر الأنواع كل واحد صندوقة له صفاته الخاصه ….
الصندوق الزجاجى ممكن يكون تعلقات واصنام بشرية في حياتك متصور انك متقدرش تعيش من غيرهم ….
الصندوق الزجاجى ممكن يكون عادات وتقاليد واعتبارات مجتمعية كل دورها هى فرملة الفجور المهاراتى الجواك
الصندوق الزجاجى ممكن يكون وزن…. سن ….جنس…..شهادة…..جنسية….أو حتى ديانة .
فكر كدة انت الحقيقي فين محبوس فين جواك وابحث عن باب الصندوق الزجاجى بتاعت وافتحه .
افتحه واستحمل صوت جرس الانذار المزعج الهيجيلك من كل شيء حولك علشان ترجع تانى جوه الحبس .
جرس إنذار بيقولك انت بتضيع نفسك .جرس إنذار بيقولك مسئولياتك ..جرس انذار بيقولك عيب وحرام .ووابل من التحذيرات للتخويف لاجبارك على قبولك الدخول للصندوق من جديد .
بس صدقنى المرة الأولى صحيت لقيت نفسك جوه الصندوق
لكن المرة دى يوم ما تتأثر بجرس الإنذار هتبقي دخلت الصندوق الزجاجى من تانى بمزاجك وبقرار منك وساعتها الخروج مرة تانيه بيكون بعيد اوى وبيكون جلاله قاسي .
لو مش قادر تصدق أو تقتنع بكلامى جرب تغمض عنيك وتتخيل نفسك واقف على مسرح بتقول أنا حر أنا حر أنا حر .
وراقب مشاعرك حاسس بأية ؟
ايه اول حاجه عاوز تعملها وانت حر ؟
تخيل كدة أن كل قوانين الكون وأحكامه بتسقط من عليك لحظة صدق حقيقية مع الذات لحظة بقيت بيها انت شايف الجميع ومحدش شايفك ايه الحاجات الهتعملها ؟
خليك صادق مع نفسك واتعرف على قيمك الحقيقية مش قيمك المجتمعية .
اتعرف على ما يمتعك بصدق وليس ما تم برمجتك عليه على أنه ممتع ..
راقب واتفرج وقيم وعاير وشوف محتاج ايه علشان تكون حر!
وياترى في ايه اغلى من الحرية ؟
الحرية جوه مش بره
