التعافي من الالم النفسي – د/ نرمين فوزي – إستشاري الصحه النفسية والإرشاد الأسري والتربوي

📌أكتر حاجة بتستنزفنا😱 …..مش الألم😭…
لكن محاولتنا الدائمة
و المستمرة للهروب منه.

بنعيش كأننا قاعدين فوق لغم،
كل حاجة حوالينا بتفكرنا إنه ممكن ينفجر في أي لحظة.
والمشكلة؟
إنه فعلًا بينفجر.
بس مش لما نكون جاهزين…
بينفجر فجأة، لما نتعب، لما ننهار، لما نكون أضعف ما يكون.

علشان كده،
ماينفعش نتعامل مع الألم كعدو لازم نهرب منه،
ولا كعار لازم نخبيه.
الألم محتاج حضن… مش سجن.

في العلاج النفسي، إتعلمت إن الطريق الوحيد للعبور الآمن من أي صدمة…
هو المرور الكامل بالألم.
مش التعلق بيه،
ولا الغرق فيه،
ولا كتمه على أمل إنه يختفي.

الألم اللي ما اتعاش، بيتحول لطاقة خام،
تتخزن جوانا… وتلاقي لها طريق تاني تخرج بيه،
على شكل غضب مفاجئ، انهيار، قسوة،
أو حتى مرض.

نحتاج نتعامل مع أنفسنا كأننا “حلة بريستو”…
كل ما البخار يزيد، لازم نفتح صمام الأمان.
نفرّغ شوية بشوية، قبل ما ينفجر كل شيء مرة واحدة.

عيّط…
اغضب…
اكتب… احكي… ارسم… خليك صادق مع مشاعرك.

بس خليك واعي…
واعٍ إنك موجوع،
لكن ما ترميش وجعك على أولادك، ولا على اللي بيحبوك،
ولا تكرّر اللي وجعك في غيرك.

اللي بيخلينا نكبر مش عدد الجروح…
لكن طريقة التئامها.

الأمان الحقيقي مش في كبت الألم…
لكن في حضنه، وفهمه، وتحريره.

دمتم بسلام داخلي لا يحتاج لتزييف.