فنان المشاهير لقاء مختلف مع كل التميز والاجتهاد لفن (الاميجورومي)

نود ان نعرف من هو الفنان ؟
(عرفنا بنفسك):

انا”رحماني الشيخ “(صانع دمي اميجورومي وممثل تابع لنقابة المهن التمثيلية اكاديمية الفنون ٢٢سنة.

عرفنا بفن الاميجورومي اكثر وتصميماتة؟

فن الاميجورومي هو فن صناعة الدمي باللغة الصينية ،،
هي عرايس او مجسمات بالكروشيه بتعتمد علي غرزة واحدة وهي الحشو
بالاضافة لتطريز ملامح الوجه بالخيوط
وفي انواع من العيون غير بتكون جاهزة
في منها بتتلزق .. ( استيكر او قماش )
وفي منها بلاستيك بتدخل في الشغل
لاكن انا بفضل التطريز اليدوي بالخيوط
لانها بتدي روح للعروسة
لانها بتاخد من حالتي المزاجيه
بتحكي حكايات ليه وذكريات
وليا طقوس معينة قبل ما ابتدي
انا لازم اليوم ده يكون مزاجي كويس
واكون اكلت اكله بحبها ومشروبي
وبسمع موسيقي معينه بحب (السيموفينيات)
لازم يكون كل العناصر دي متوفرة بالنسبالي علشان تخرج بشكل جميل وروح حلوة
وبقية بقي تفاصيل العروسة
زي الشعر في منه انواع
في شعر خيوط
وفي شعر حراري مخصص للعرائس وده بيبقي جاهز وبيتركب بطرق معينة وده طبعا بيبقي في امكانيات اكبر
وبقية اكسسوارات العروسة اللي هي بتبقي مكملة ليها وتخرج منتج محترم

ماهو حافزك لدخول هذا الفن (الاميجورومي)؟

كنت في مرة شوفت صورة خارجيه لفيديو علي اليوتيوب لعروسه الاميجورومي وقولت اكيد مش حقيقيه وعاطله في الاخر حاجه تانيه وفتحتها وطلعت ورشة لاحدي الفنانات وبدأت أعملها واهديتها لانسانه كنت مرتبط بيها في الوقت دة ومكنتش هكمل تاني لانها خدت وقت كبير (بس طبعا مفييش الكلام ده)الفن بينادي صاحبه واسعدني في اني اعملها بسهولة كان عندي خلفية سابقة من وانا صغير عن الكورشية كنت اخدتها (من والدتي )رحمة الله عليها هي حرفيًا اول واحدة تعمل اميجورومي في العالم تقريبًا لانها كانت بتعمل مفارش فراخ وكتاكيت وحاجات كدة والكلام دة يعتبر من اكثر من ٤٠سنة واكثر (والاميجورومي )دخل مصر من حوالي (٥او ٦سنين).

هل اخدت كورسات فيه ،او قدرت ازاي تنمي موهبتك اكثر ؟

اه اخدت كورسات بعد حوالي سنه من تطويري الذاتي لنفسي وبعدين اخدت كورسات في مرحله التطور علشان ازود خبرات وحاليًا انا بعمل كورسات احترافيه وعندي قناة علي اليوتيوب تعليمية وعندي براند خاص بيا بسعي لتحقيقه وانه يكبر
وهو

Star_designer_مصمم_النجوم

وهدف البراند اني اعمل مجسم لنجم او فنان واديهاله بنفسي واتصور معاه .

من خلال تواصلك وخبرتك في الميديا رأيك في جروب “خليك مشهور”؟

جروب ممتاز حرفيًا ومتفاعل وبيشجع كل المواهب علي الظهور وبيقدم مساعدات كثير ماشاء الله وكل التوفيق والنجاح يارب .

ماهي اوجه الاختلاف بين الكورشية والاميجورومي ومايميزة عنه؟

الكروشيه في العموم هو بحر من للغرز والابتكارات ممكن يتعمل منه اي حاجة زي الملابس والمفارش والورود والتحف والارضيات والستائر وما الي ذلك
بالنسبة للاميجورومي ف هو بيعتمد علي غرزة واحده زي ما ذكرت قبل كده لحضرتك وهي غرزة الحشو
وممكن الاستعانه ببعض الغرز في بعض الاحيان لاكن مش اساسية
والاميجورومي بيبقي مجسمات عرائس داخلها مجوف وبيتحشي بالفايبر وبيتحط فيه هيكل معدني طيع وامن لسهوله الحركه..
وبتبقي شئ مجسم ملموس
وهو يعتبر هدايا للأطفال
واحيانا كثيرة للكبار كمان
اغلب اللي بيطلب اوردرات بيطلبها لنفسه
بتبقي عروسة شبهه ،
غير العروسة العادية اللي بتبقي من وحي الخيال ولابسه شيك وشعرها طويل وهكذا من التفاصيل الاخري،،
العروسة او المجسم الشبه بيبقي شبه الشخص اللي هيبعتلي صورة ليه بكل التفاصيل اللي فيها ….
لابس ايه طويل او قصير تخين او رفيع
كل التفاصيل وشكله
ف بتبقي النتيجة ذكري شبه الشخص في المرحلة العمرية دي زي الصورة بتدوم معاه العمر.

لو قلنا لحضرتك توجه كلمه لرئيس مجلس الإدارة المستشار /حسن حميد
تقوله اية؟

كل الشكر والتقدير لحضرتك علي مجهودك ونشاطك انت وجميع القائمين علي النشاط المستمر ولكم مني كامل الاحترام والتقدير وكل التوفيق .