ماتستهليش حتى تتعدي
بين المخاليق كإنسانه
بريئه منك الأحاسيس
خطوط الغش
موضوحه على عيونك
بريقها يلتمع لمعان
تشوفه تقول مافيش زيه
لكن القرب من ضيه
بيظهر غشه وخداعه
أتارى اللمعه دى خنجر
بيستنى
يلاقي الفرصه ويطاعن
وتيجي الطعنه…. ف المقتل
ياريت القتل وكفايه
كمان الخسه جواكي
بتمشي حزينه مسكينه
وتعمل مابيدها حيله
ومحتاجه
حنين الدنيا لوجودها
تعيد الكره من تاني
ويتكرر بأصل جديد
وفصل جديد
وف الآخر
يلاقى الحس مخنوقله
ماتستهليش ضيا شمسى
تطل ف يوم ف شباكك
ياإنسانه
بليده كل أحاسيسك
هجاءها كله أنانيه
سفينة الغش جواكي
بتتحرك وترمي كل مافيها
لكن الغش مابيخلص
ماتستهليش
ليالي كنت بعشقها
ولا أيام أعد نهار لياليها
وأناديها وأناجيها وأقول سابقيني لعيونها
وعودي خديني من تاني
ماتستهليش تكوني شمس للدنيا
لأن الشمس عطاءه
بتدي الحق لاصحابه
ويتلاقوا
وصح القول على مثلك يحب القط خناقه
وصفت الضي ف كفوفك بيتوضى عبير الحب
أنا آسف
ده أصل الوصف مش ليكي
ياأحلامي وأيامي
ب….اقدم كل اعذاري
على قولي كده مره
كابوس أيامي ودعيا
مايزعج قلبي بالمره
ماتستهليش
تكوني عاشقه أيامي
ماتستهليش
تكوني غنوه ف احلامي
ماتستهيش حتى تتعدي
بين المخاليق….. ك…..إنسانه
