almasalsharq
مقالات مشابهة
عارف ياحب العمر أنا مين؟
أنا العاشقة اللي صابرة
علي بعدك ياعمر سنين
أنا النور اللي أوصاله
تسبح في روح هايمة
في سماك ياضي العين
أنا النسمة اللي ترد الروح
وتتمنى تراب رجليك
وتجدل لك من الشوق خفين
أنا الإيد اللي بتمسح لك
دمعة تسيل على الخدين
أنا المجروحة في الزفة
وبضحك كما الناي الحزين
هجرت كل أحبابي وأصحابي
عشان أقدر أشاورلك بمنديلي
لأن الصوت ما يوصلك مع الزحمة
وأنا مبحوحة من ردي على اللايمين
أنا الصادقة في إحساسي
وعمري في يوم ماكون خداعة
تتلون وتتزين مع الماشيين
أنا المجنونة حبيتك وعشت معاك
في أوصالك وأسرارك وشوفت
معاك تفاصيلك وقلت آمين
أنا اللي الدهر شكلها وعلمها
تصون الملح واللقمة مع الشاريين
حبيبي ياتاج فوق راسي ونبراسي
يا مالك كل وجداني وإحساسي
ولسة تقول أنا عاقلة دانا لسه
يادوب خطوة وأكون مع المجانين
أنا الحلم اللي ضاع في هواك
وساكن جوه أحضاني بشوق وحنين
نفسي أبوح باللي جواية
وأصرخ بعلو الصوت يانبض حزين
إنت حبيبي وشايل كل أسراري
معاك أكبر ويطول عودي ويزهر
وعلى بابك وضعت حمولي واستنى
هنبدأ تاني أيامنا منين ولفين
نفسي أحضن الأيام معاك
وأنسى كل آلامي بنظرة عين
وأرسم جسر يوصلني وينقلني
لبر الروح تهيم حواليك على الجانبين
وأبني لك مدار بيسير ولايخطئ
يانبض القلب والشرايين
****
