almasalsharq
مقالات مشابهة
اخصائي تعديل سلوك وإرشاد اسري ورئيس قسم الأمومه والطفوله والصحه النفسيه جريدة الماس الشرق
اكثر مشكلات الأمهات ( الطفل العنيد )
لما أم أو أب بيشتكوا من عناد طفلهم ، أول سؤال بسأله ، بتتعاملوا مع الطفل ازاى ؟؟؟
السلوك فيه جانب منه وراثى وجانب منه مكتسب ، مكتسب يعنى الطفل شاف السلوك دا أمامه ، طيب سلوك زى العناد الطفل بيشوفه ازاى ؟؟
فى عمر 12شهر و18شهر بيبدأ الطفل يزحف ويمشي ويمسك كل اللى يقابله ، هو فى المرحلة دى بيكون عندة حاجة حب الإستكشاف والإستقالاليه ،
فهتلاقيه عاوز يمسك اي حاجه أمامه ويضعها فى فمه ، عاوز يشرب لوحدة ، يمسك حاجات سخنه ، يضع يدة فى الكهرباء ، واى حاجه هتقوليله سيبها ومتمسكهاش ، هيروح من وراكي وهيمسك الحاجه دى ودا بسبب انه عاوز يستكشف كل اللى حواليه .
فانتى لما……
لما تأيدي حركته هيعاند
لما هتتعصبي وتضربية هيعاند
لما هتكلمية بلغة صارمة هيعاند
لما مش هيحس انه موجود هيعاند
لما هترفضيله طلب من غير مبررات هيعاند
لما هتتجاهليه ومش هتشبعيله حاجته من الشَوفان والحب هيعاند
لما هتكليمه بلغة النفي لالالالا ، هيعاند وهيتعلم كلمة لأاااا
نعمل إيييييه بقى !؟
بطلب منكم تعرفوا ان لكل مرحلة عمرية لها خصائص وسمات … ايه بقى السمات دى ؟
🤝انه عاوز يلعب لأنه طفل ، “”ما الطفل طفل إلا ليلعب”‘ ، سيبيه ينطلق ويلعب ، حاولى بس تشيلي الحاجات الغالية من قدامه او الحاجات اللى ممكن تأذيه
بصى ، انك تقعديه غصب عن طبيعته اللى بتقوله قوم العب واستكشف علشان تنمو ، وقتها هيحس بقلق لانه محتار يرضيكي ولا يرضي دوافعه الداخليه ، فغصب عنه هيعند معاكي وحركته هتزداد
🤝هتقوليله لأ هيقولك لألأ ، لانه اكتسب من حضرتك لغة نفى ، فلما هتطلبى منه حاجه هيرفض زى ما انتى بترفضى وبعدين الطفل اللى بيقول لأ طفل سوى .
🤝مش كل حاجه تمسكيها عليه وتتعصبي وتتنرفزى ،دا مش هيجيب نتيجه
🤝هتقوليله متعملش هيعمل ، هو اصلا مش بيفهم النفى دا هو عاوز يستقل بنفسه ويستكشف ، فحولى لغة النفى والتهديد للغة بسيطه بها ثواب
( بدل ماتقوليله لو ماحلتش الواجب مش هاتلعب قوليله ايه رايك نحل الواجب علشان تلعب فالطفل لما يحس إنه هياخد تعزيز مقابل الحاجة اللى هيعملها هيعملها وهو فرحان )
🤝 اعطى للطفل اختيارات متعددة ،
إنتى عايزاه ينام مثلاً الساعة 10 ماتجيش مرة واحده وتقوليله قوم نام لأ تعالى قبلها وقوليله تحب تنام الساعة 9 ولا 10
🤝 استخدمى المبررات للطفل ، بلاش تكتفى بالرفض بس ، لا بينيله السبب كمان بلغة مبسطه
🤝 اشبعيله حاجته للحب والإهتمام والشَوفان انه يتشاف ويحس انه موجود
🤝 لما يمسك حاجه سخنه او حاجه خطر ، متتخضيش وتتعصبي ، اضحكى له وقوليله اى دا بتعمل اي وانتى مبتسمه كدا ومثليله ان الشئ دا خطر ليه ، يعنى مثلا لو كوب ساخن هاتي ايدة وقربيها ناحية الكوب وحسسيه بحرارتها
🤝 خلى بالكوا ان فى جملة شهيرة أوى بندرسها كل سنين الجامعة اسمها ( مع مراعاة الفروق الفردية ) يعنى لكل طفل سماته ومميزاته ومواهبه ، فمتقارنيهوش بطفل تاني
اننا نقرأ الكلام دة حاجه سهله ، تطبيقه صعب ، صعب فى الأول ، بعد كدا هيبقى سهل ليكي وله
ربنا يبارك فى أولادنا جميعا يارب العالمين 🤲
