حاجات لازم تعملها لو عندك طفل 💌بقلم أ/ أمنية عبد الرازق

اخصائي تعديل سلوك ورئيس قسم الأمومه والطفوله والصحه النفسيه جريدة الماس الشرق

1- الحضن
من غير شروط وفى أى وقت وفى أى مكان ، احضن طفلك ،
الحضن مفيد جدا وبيزود هرمونات السعادة

2- الإشباع
الإشباع المادي بيخلي الطفل عينه مليانه وطبعا من غير تبذير ، أحياناً الطفل بيطلب حاجات كتير ف أولاً لازم تعرف الطفل عاوز الشئ دا ليه ؟؟ وكمان الأفضل انى معودوش انى اجيبله كل حاجه هو عاوزها علشان ميفقدش قيمة الحاجه وعينه متشبعش ودا بيكون بأسلوب مناسب لسنه ، كمان الإشباع المعنوى مهم من النظرة والسقفه والحضن والكلام الحلو اللى يشجعه

3- المدح
وانا بمدح الطفل ياريت ابعد شويه عن أسلوب المقارنات يعنى مقولش انت احسن من فلان ، انت اشطر من فلانه لأن دا هيربي عند الطفل انه لازم يكون الأحسن ، فالأفضل انى اقول انت شاطر … انت جميل ، لو بيرسم مثلا اقول رسوماتك بتحلو كل مرة . نركز فى الاسلوب .

4- الثقة
الطفل بيستمد الثقة من أسلوب اهله معاه ، انى مقارنوش بحد… اعطى له مهام تناسب سنه ، و كل ما بياخد دعم منهم وكل ما بيحس انه بيتطور دا بيفرق معاه والأهم انى اشجع أى جهد بيعمله واقارنه بينه وبين نفسه .

5-احساس الأمن والامان
كل ما الاحساس دا عند الطفل بيزيد ، بتلاقيه طفل مبدع وواثق من نفسه وبيحب نفسه وبيحب اللى حواليه .

6-الإستماع
اسمعوا ولادكم وهما فرحانين وهما زعلانين وهما رغايين وبيزنوا وطبطبوا عليهم ، واعمل وقت برضو انك تحكى لطفلك على اى حاجه وتاخد رأيه فى حاجات تناسب سنه .

7- الإهتمام
اهتموا بأطفالكم حتى وانتو بتشتغلوا ، اتصلوا اطمنوا عليهم وقولوا ليهم وحشتنى ، حبيت اسمع صوتك ،وبلاش كلام انا بشتغل وطالع عيني علشان اجيبلكوا فلوس ، متحسسهمش انهم حاجه تقيله عليكم

8- الخروج
خرجوا ولادكم وفسحوهم على حسب ظروفكم الماديه ، احنا مش عارفين الكورونا هتفضل لامتى ؟؟ ناخد احتياطتنا ونفسحهم ونخليهم يختاروا يروحوا فين وياكلوا ايه

9- الإحترام
زى ما بنطلب منهم انهم يحترمونا ويحترموا الناس ، احنا كمان لازم نحترم خصوصيتهم ، استأذنوا وانتو بتاخدوا حاجتهم ، استأذنوا وانتو داخلين اوضتهم … هتلاقيهم هما كمان بيعملوا كدا

10- التقليد
الطفل بيتعلم بالتقليد ، فكن انت قدوة حسنه يتعلم منها الفاظ وسلوكيات جيدة وتكوين نفسي سوي .

11- القبول
اقبلوهم وحبوهم حب غير مشروط ، مش علشان الطفل عمل حاجه غلط يبقى انا كدا بكرهك وابعد عنى ، لأااااااااااااااااااا انا بحب ابنى فى كل أحواله ، اه هتتعاقب لما فى سلوك حذرتك منه مرتين تلاته وكررته ، متقوليلوش اعمل كذا علشان احبك ، علشان ربنا يحبك ،،، كل دا غلط ، عوديه انك بتحبيه لانك بتحبيه

12- الوعي الجمعي ❌
يعنى انا بذاكر لابنى علشان الناس ميقولوش الولد فاشل
يعنى انا بطبخ علشان محدش يقول عنى مهمله لجوزها ولبيتها
يعنى انا بشتغل علشان اجيب لأولادى فلوس علشان الناس

أغلب الناس بيكون دا تفكيرهم لذلك الأم مش بتطيق تعد مع ابنها تذاكر له ، هى بتكون عاوزة انه ينجز بقى ويحفظ الكلمتين غصب عنه وقوم زهقتنى وتضربه وتقوله يا فاشل دون مراعاة انه قادر يذاكر ولالا او الطريقه اللى هتناسب معاه …..

بس فعلا الطريقه دى مش بتوصل للطفل حاجه غير
👈 هنعمل كل حاجه علشان الناس👉 علشان كدا الطفل مش واصله انك بتخافى عليه هو ، لانك فعلا مش خايفه عليه هو ، لو سألتي نفسك هتلاقى الاجابه علشان الناس وشكلنا قدام الناس ..

خلى كل حاجه بتعملوها لأولادكم علشانهم هماااا مش علشان الناس