almasalsharq
مقالات مشابهة
تختلط الامور لدى البعض بين مهام الطبيب النفسي و مهام الاخصائي النفسي…
كثيرا نخلط بين الاخصائي النفسي و الطبيب النفسي اللي دايما بيكونوا في فريق واحد ، بس المشكلة ان الخلط بينهم دايما بيكون ضحيته المريض نفسه اللي اغلب الوقت بيبقي محتاج مساعدة الاتنين مع بعض ، فهنحاول نشرح الفرق بين الاتنين في وصفة سهلة شوية علينا .
- اولا … الاخصائي النفسي بيكون تركيز دراسته دايما اكتر علي الافكار و المشاعر و السلوك و كيفية تواصلهم مع بعض و ازاي يفهمهم و يوصلهم للمريض و يساعد بيهم المريض انه يفهم نفسه اكتر و يقدر كمان يستخدمهم في صالحه و ازاي الدوافع الانسانية و الشخصية ممكن تساهم في صنع شكل المرض ، من ناحية اخري الطبيب النفسي بيكون تركيزه الاساسي علي فهم تطور الاعراض من الناحية البيولوجية الاول وازاي فيسيولوجية الجهاز العصبي ووظائف المخ المختلفة ممكن تؤدي لمثل هذه الاعراض و ازاي تؤدي للمرض .
- التشخيص : هنا ممكن الاتنين يتقابلوا شوية و يكون عندهم بعض الخبرات المتشابهة و خصوصا الطبيب و معاه الاخصائي النفسي الاكلينيكي ، و ان كان الاعم و الاشمل ان يكون التشخيص المرضي للطبيب لان التشخيص هنا مش معناه تحديد الاعراض و الامراض النفسية فقط ، ده كمان بيتطلب عمل فحص اكلينيكي للاعراض الجسدية الاخري اللي ممكن تتشابه في شكلها مع المرض النفسي شوية زي مرض الغدة الدرقية و الانيميا و غيرها كتير من الامراض ، فالطبيب هنا دوره محوري و ضروري و مطلوب لضمان التشخيص السليم .
- العلاج : الاخصائي النفسي بيعتمد دايما علي العلاج الكلامي بانواعه العلمية المختلفة (بغض النظر عن التعقيدات العلمية في الدول المختلفة ) و برغم كونه علاج كلامي الا انه يقدر يغير من كيمياء المخ و يحسن التوازن فيها ، العلاج الكلامي مش مجرد فضفضة ، هو طريقة لفهم الافكار و ادارة المشاعر والسلوك ، الطبيب بيعمل نفس الهدف و لكن في الاساس عن طريق العلاج الدوائي اللي احيانا بيكون اساسي و محوري و بدونه لا تتحسن الحالة حتي مع العلاج الكلامي ، لان العلاج الدوائي ساعات كتير بيكون مهم لتحسين فيسيولوجية و رد فعل الجهاز العصبي و يساعده في ذلك العلاج الكلامي بأنواعه المختلفة ،
بس دايما اللي بيحددلنا نوع العلاج المطلوب سواء كان العلاج الدوائي او العلاج الكلامي هو نوع المرض نفسه و نوع الاعراض و شكلها ، و احيانا كتير جدا و في اغلب الاحيان بيكون اختيار نوعين العلاج مع بعض هو الاختيار الامثل للعلاج و التحسن.
ده ببساطة اهم الفروق ما بين الاخصائي النفسي و الطبيب النفسي .
🙋♀️ تحياتى للجميع 🙋♀️
🌿انتظرونى مع مقال جديد ومفيد
